ଡବଲ ଇଞ୍ଜିନ ସରକାରରେ ବଲାଙ୍ଗୀର ଜିଲ୍ଲାକୁ ଗୁରୁତ୍ଵ

ବାଲାଙ୍ଗୀର (ଜେଏନ୍ଏସ୍)୧୩ /୬,  ରାଜ୍ୟରେ ବିଜେପିର ଡବଲ ଇଞ୍ଜିନ ସରକାର ଆରମ୍ଭ ହୋଇଛି । ମୋହନ ସରକାରରେ ବଲାଙ୍ଗୀର ଜିଲ୍ଲାକୁ ଗୁରୁତ୍ଵ ଦିଆଯାଇଛି । ପାଟଣାଗଡ଼ରୁ ୬ଥର ବିଧାୟକ ହୋଇଥିବା କନକବର୍ଦ୍ଧନ ସିଂଦେଓଙ୍କୁ ଉପମୁଖ୍ୟମନ୍ତ୍ରୀ ପଦ ଓ ଲୋଇସିଂହା ବିଧାୟକ ଡ.ମୁକେଶ ମହାଲିଙ୍ଗଙ୍କୁ କ୍ୟାବିନେଟ ମନ୍ତ୍ରୀ ପଦ ମିଳିଛି । ଗତ ୨୦୦୦ ମସିହାରୁ ୨୦୦୯ ମସିହା ପର୍ଯ୍ୟନ୍ତ ନବୀନ ପଟ୍ଟନାୟକ ସରକାରରେ ବଲାଙ୍ଗୀର ଜିଲ୍ଲାରୁ ଦୁଇଜଣ ମନ୍ତ୍ରୀ ଅନଙ୍ଗ ଉଦୟ ସିଂଦେଓ ଓ କନକବର୍ଦ୍ଧନ ସିଂଦେଓ ରହିଥିଲେ । ତେବେ ୨୦୦୯ରେ ବିଜେଡି-ବିଜେପି ମେଣ୍ଟ ଭାଙ୍ଗିଲା ପରେ ବିଜେଡିରୁ ବଲାଙ୍ଗୀର ଜିଲ୍ଲାରୁ ମାତ୍ର ଜଣକୁ ମନ୍ତ୍ରୀପଦ ମିଳି ଆସୁଥିଲା । ଚଳିତ ଥର ସରକାର ବଦଳିବା ପରେ ବିଜେପି ସରକାରରେ ବଲାଙ୍ଗୀର ଜିଲ୍ଲାକୁ ଦୁଇଟି ଗୁରୁତ୍ୱପୂର୍ଣ୍ଣ ବିଭାଗ ମିଳିଛି । ମହାରାଜା ରାଜେନ୍ଦ୍ରନାରାୟଣ ସିଂଦେଓ ୧୯୬୭ -୧୯୭୧ ମସିହା ପର୍ଯ୍ୟନ୍ତ ଗଣତନ୍ତ୍ର ପରିଷଦ ଦଳରୁ ମିଳିତ ସରକାରର ମୁଖ୍ୟମନ୍ତ୍ରୀ ଥିଲେ । ତାଙ୍କ ପରେ ବଲାଙ୍ଗୀର ଜିଲ୍ଲାକୁ ନୂଆ ସରକାରରେ ପ୍ରଥମ କରି ଉପମୁଖ୍ୟମନ୍ତ୍ରୀ ପଦ ମିଳିଛି । କନକବର୍ଦ୍ଧନ ସିଂଦେଓ ବଲାଙ୍ଗୀର ରାଜପରିବାରର ମହାରାଜା ରାଜେନ୍ଦ୍ର ନାରାୟଣ ସିଂଦେଓଙ୍କ ନାତି ଓ ପୂର୍ବତନ ସାଂସଦ ମହାରାଜା ରାଜରାଜ ସିଂଦେଓଙ୍କ ଜ୍ୟୋଷ୍ଠପୁତ୍ର । କନକଙ୍କ ପତ୍ନୀ ସଂଗୀତା କୁମାରୀ ସିଂଦେଓ ବର୍ତ୍ତମାନର ବିଜେପି ସାଂସଦ । ସ୍ୱର୍ଗତ ରାଜରାଜ ସିଂଦେଓ ୧୯୮୦ ମସିହାରୁ ବିଜେପିର ଜଣେ ପ୍ରତିଷ୍ଠାତା ସଦସ୍ୟ ରହିଥିଲେ । ସେହିଦିନ ଠାରୁ ତାଙ୍କ ପରିବାରକୁ ବିଜେପି ସାଂସଦ ଟିକେଟ ଦେଇଆସୁଛି । ସଂଗୀତା ସିଂଦେଓ ଚଳିତଥରକୁ ମିଶାଇ ପଞ୍ଚମଥର ସାଂସଦ ଭାବରେ ଜିଣିଛନ୍ତି । ଏବେ କନକଙ୍କୁ ଉପମୁଖ୍ୟମନ୍ତ୍ରୀ ପଦବୀ ମିଳିଥିବାରୁ ଦୀର୍ଘବର୍ଷ ହେଲା ବିଜେପିର ମଙ୍ଗଧରିଥିବା ସିଂଦେଓ ପରିବାରକୁ ବିଜେପି ଯଥେଷ୍ଟ ସମ୍ମାନ ଦେଇଛି । କନକବର୍ଦ୍ଧନ ସିଂଦେଓ ୧୯୯୫ ମସିହାରୁ ୨୦୧୯ ମସିହା ପର୍ଯ୍ୟନ୍ତ ଲଗାତାର ୫ଥର ପାଟଣାଗଡ଼ରୁ ବିଧାୟକ ହୋଇଥିଲେ । ୨୦୧୯ରେ ସେ ପରାଜିତ ହୋଇଥିଲେ ଓ ଏଥର ୨୦୨୪ ନିର୍ବାଚନରେ ପୁଣି ଥରେ ବିଧାୟକ ହୋଇଛନ୍ତି । ୨୦୦୦-୨୦୦୪ ପର୍ଯ୍ୟନ୍ତ ଶିଳ୍ପମନ୍ତ୍ରୀ ଓ ୨୦୦୪-୨୦୦୯ ମସିହା ପର୍ଯ୍ୟନ୍ତ ନଗର ଉନ୍ନୟନ ମନ୍ତ୍ରୀ ରହିଥିଲେ । ସେହିପରି ୨୦୧୩ ମସିହାରୁ ୨୦୧୬ ମସିହା ପର୍ଯ୍ୟନ୍ତ ବିଜେପି ଦଳର ରାଜ୍ୟ ସଭାପତି ମଧ୍ୟ ରହିଥିଲେ । ଉଭୟ ସଂଗଠନ ଓ ବିଧାନସଭାରେ ତାଙ୍କର ଅଭିଜ୍ଞତା ରହିଛି । ସେହିପରି ଲୋଇସିଂହା ବିଧାୟକ ଡ.ମୁକେଶ ମହାଲିଙ୍ଗଙ୍କୁ ମଧ୍ୟ କ୍ୟାବିନେଟ ମନ୍ତ୍ରୀ ପଦ ମିଳିଛି । ମୁକେଶ ଲୋଇସିଂହା ଏସ୍.ସି. ସଂରକ୍ଷିତ ନିର୍ବାଚନ ମଣ୍ଡଳିର ଦ୍ୱିତୀୟ ପାଳିର ବିଧାୟକ । ଗତ ୨୦୧୯ରେ ପ୍ରଥମ କରି ଜିଣିଥିଲେ ଓ ଏଥର ଦ୍ୱିତୀୟ ପାଳିରେ ବିପୁଳ ଭୋଟ ବ୍ୟବଧାନରେ ସେ ଜିଣିଛନ୍ତି । ଆଗଲପୁର ବ୍ଲକ ନଅଗାଁ (ଖ) ନୀବାସୀ ମୁକେଶଙ୍କ ଛାତ୍ର ଜୀବନ ବରଗଡ଼ ଜିଲ୍ଲାର ପଦ୍ମପୁରରେ କଟିଛି । ତାଙ୍କ ବାପା ଓ ମାଆ ଉଭୟ ଶିକ୍ଷକ,ଶିକ୍ଷୟୀତ୍ରୀ ଥିଲେ । ତାଙ୍କ ତତ୍ତ୍ୱାବଧାନରେ ଛାତ୍ରାବସ୍ଥାରୁ ଜଣେ ମେଧାବୀ ଛାତ୍ର ରହି ଆସିଥିଲେ । ପଦ୍ମପୁର ରାଜବୋଡା ସମ୍ବର ହାଇସ୍କୁଲରୁ ମାଟ୍ରିକ, ପଦ୍ମପୁର ଅଞ୍ଚଳ କଲେଜରୁ ଯୁକ୍ତଦୁଇ ଓ ଯୁକ୍ତତିନି ବିଜ୍ଞାନ(ପ୍ରାଣୀବିଜ୍ଞାନ) ରେ ଶିକ୍ଷା ସରିଲା ପରେ ଉତ୍କଳ ବିଶ୍ୱବିଦ୍ୟାଳୟରୁ ସ୍ନାତକୋତ୍ତର କରିଥିଲେ । ୧୯୯୭ରେ ସେ ବଲାଙ୍ଗୀର ବିଇଡି କଲେଜରେ ଶିକ୍ଷାଲାଭ କରିଥିଲେ । ଏହାପରେ ପୁଣି ଉତ୍କଳ ବିଶ୍ୱ ବିଦ୍ୟାଳୟକୁ ଫେରି ସେଠାରେ ଲାଇଫ ସାଇନ୍ସରେ ଏମ.ଫିଲ ଓ ତାପରେ ୨୦୦୭ରେ ପରିବେଶ ବିଜ୍ଞାନରେ ସ୍ୱତନ୍ତ୍ର ଫେଲୋସିପ ପାଇ ପିଏଚଡି ଡିଗ୍ରୀ ଲାଭ କରିଥିଲେ । ଏହା ସହିତ ରାଜ୍ୟ ଅର୍ଥନୈତିକ ପରିଚାଳନାରେ ମଧ୍ୟ ସେ ଏକ ସ୍ୱତନ୍ତ୍ର କୋର୍ସ କରିଛନ୍ତି । ଛାତ୍ର ଜୀବନରୁ ଶ୍ରୀ ମହାଲୀଙ୍ଗ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ(ଏବିବିପି)ର ସସଦ୍ୟ ରହି ବିଜେପିର ଧର୍ମେନ୍ଦ୍ର ପ୍ରଧାନଙ୍କ ସହ ସୁସମ୍ପର୍କରେ ରହିଆସିଥିଲେ । ସେଥିପାଇଁ ରାଜ୍ୟପ୍ରଦୁଷଣ ବୋର୍ଡରେ ଜଣେ ଉଚ୍ଚ ବେତନଧାରୀ ପରିବେଶ ବିଜ୍ଞାନୀ ଚାକିରିରୁ ଅବସର ନେଇ ମୁକେଶ ୨୦୧୯ରେ ବିଜେପିରେ ଯୋଗଦେଇ ଲୋଇସିଂହାର ବିଜେପି ବିଧାୟକ ପ୍ରାର୍ଥି ହୋଇଥିଲେ । ଊଭୟ ଥର ସେ ଭଲ ଭୋଟ ବ୍ୟବଧାନରେ  ବିଧାୟକ ଭାବରେ ନିର୍ବାଚିତ ହୋଇଛନ୍ତି । ବିଧାନସଭା ରେ ତାଙ୍କର ଉତ୍ତମ ବ୍ୟବହାର, ଉପସ୍ଥାପନା ଓ ତର୍କପୂର୍ଣ୍ଣ ଯୁକ୍ତି ତାଙ୍କୁ ଲୋକପ୍ରିୟ କରିଛି । ଶ୍ରୀ ମହାଲିଙ୍ଗଙ୍କୁ କ୍ୟାବିନେଟ ମନ୍ତ୍ରୀପଦ ମିଳିଥିବାରୁ ଜିଲ୍ଲାରେ ଖୁସିର ମାହୋଲ ରହିଛି । ନୂଆ ସରକାରରେ ବଲାଙ୍ଗୀର ଜିଲ୍ଲାକୁ ଗୁରୁତ୍ଵ ଦିଆଯାଇଥିବା ବେଳେ ପଶ୍ଚିମ ଓଡିଶା ପାଇଁ କିଛି  ବଡ଼ ପ୍ରକଳ୍ପ ଆସିବାର ସମ୍ଭାବନା ସୃଷ୍ଟି ହୋଇଛି।