ଜାଲ୍ ନୋଟ୍ କାରବାରରେ ୨ ଗିରଫ, ୪୯ହଜାର ଟଙ୍କାର ନକଲି ନୋଟ୍ ଜବତ

ଟିଟିଲାଗଡ଼,୧୦/୦୪/୨୦୨୫(ଜେଏନ୍ଏସ୍), ଟିଟିଲାଗଡ଼ରେ ନକଲି ନୋଟ କାରବାର ହେଉଥ‌ିବା ବିଶ୍ୱସ୍ତ ସୂତ୍ରରୁ ଖବର ପାଇ ଭୁବନେଶ୍ଵର ଏସ୍.ଟି.ଏଫ୍.ଦଳ ସ୍ଥାନୀୟ ପୁଲିସ ସହାୟତାରେ ୨ଜଣ ନକଲି ନୋଟ କାରବାର କରୁଥିବା ଯୁବକଙ୍କୁ କାବୁ କରିବା ସହ ସେମାନଙ୍କ ଠାରୁ ୪୯ହଜାର ଟଙ୍କାର ନକଲି ନୋଟ ଜବତ କରି ସ୍ଥାନୀୟ ପୁଲିସକୁ ଜିମା ଦେଇଛି । ସୂଚନା ଅନୁଯାୟୀ ବିଶ୍ଵସ୍ତ ସୁତ୍ରରୁ ଖବର ପାଇ ଦୁଇ ଦିନ ପୁର୍ବେ ଭୁବନେଶ୍ଵର ଏସ୍.ଟି.ଏଫ୍. ଦଳର ଡି.ଏସ୍.ପି ରଶ୍ମିରଞ୍ଜନ ପଟ୍ଟନାୟକ ଓ ଟିମ୍ ଟିଟିଲାଗଡ଼ ପହଞ୍ଚି ସ୍ଥାନୀୟ ପୂର୍ତ୍ତବିଭାଗ ଡାକବଙ୍ଗଳାରେ ଡେରା ପକାଇଥିଲେ । ଏଥିସହ ନକଲି ନୋଟ ବ୍ୟବସାୟୀଙ୍କ ଉପରେ ତୀକ୍ଷ୍ଣ ନଜର ରଖି ନକଲି ନୋଟ ବ୍ୟବସାୟୀଙ୍କୁ କାବୁ କରିବା ପାଇଁ ଜାଲ ବିଛାଇଥିଲେ । ଏହି କ୍ରମରେ ଏସ୍.ଟି.ଏଫ୍. ଜଣେ ବ୍ୟକ୍ତିଙ୍କୁ ଗ୍ରାହକ ସଜାଇ ତାଙ୍କ ନିକଟକୁ ପଠାଇଥିଲେ । ଟିଟିଲାଗଡ଼ ବ୍ଳକ ଶଗଡ଼ଘାଟ ପଞ୍ଚାୟତ ବାଞ୍ଜିଝାଲ ଗ୍ରାମରେ ନକଲି ନୋଟ କାରବାର ସମୟରେ ଅତର୍କୀତ ଭାବେ ଏସ୍.ଟି.ଏଫ୍. ଦଳ ଓ ସ୍ଥାନୀୟ ପୁଲିସ ଚଢଉ କରି ସ୍ଥାନୀୟ ରଘୁନାଥ ପଡ଼ା ବାସିନ୍ଦା ସ୍ୱର୍ଗତ ମହମ୍ମଦ ବସିରଙ୍କ ପୁଅ ମହମ୍ମଦ ସବୀର (୪୫) ଓ ସିକେର ଗ୍ରାମର ମେଘ ରାଉତଙ୍କ ପୁଅ ନେତ୍ର ରାଉତ (୪୪) ପ୍ରମୁଖ ୨ଜଣଙ୍କୁ କାବୁ କରିବା ସହ ସେମାନେ ଧରିଥିବା ନୀଳରଙ୍ଗର ଏକ ବ୍ୟାଗ ଜବତ କରିଥିଲେ ।ଉକ୍ତ ବ୍ୟାଗରେ ୯୮ଟି ୫ଶହ ଟଙ୍କିଆ ନକଲି ନୋଟ, ମୋଟ ୪୯ହଜାର ଟଙ୍କା, ନକଲି ନୋଟ ପ୍ରସ୍ତୁତି ପାଇଁ ବ୍ୟବହାର କରାଯାଉଥୁବା ୨୪୩୦ଟି କଳା କାଗଜ ସମେତ ବିଭିନ୍ନ ଉପକରଣ ଓ ୩ଟି ମୋବାଇଲ ଜବତ କରିଥିଲେ । ଚଢଉ ପରେ ଅଭିଯୁକ୍ତ ଦ୍ଵୟଙ୍କ ସମେତ ଜବତ ନୋଟ ଓ ଅନ୍ୟାନ୍ୟ ସାମଗ୍ରୀ ସ୍ଥାନୀୟ ପୁଲିସକୁ ଜିମା ଦେବା ସହ ଏସ୍.ଟି.ଏଫ୍. ଡି.ଏସ୍.ପି ଶ୍ରୀ ପଟ୍ଟନାୟକ ସ୍ଥାନୀୟ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ସ୍ଥାନୀୟ ପୁଲିସ ଥାନା କେସ ନମ୍ବର ୧୨୭/୨୦୨୫ରେ ଏକ ମାମଲା ରୁଜୁ କରି ଗିରଫ ଅଭିଯୁକ୍ତ ଦ୍ଵୟଙ୍କୁ କୋର୍ଟ ଚାଲାଣ କରିଥିବା ସ୍ଥାନୀୟ ଏସ୍.ଡି.ପି.ଓ ଯଶୋବନ୍ତ ନାରାୟଣ ପ୍ରଧାନୀ ଓ ଥାନାଧିକାରୀ କଲ୍ୟାଣୀ ବେହେରା ଆହୁତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ତେବେ ଜାମିନ ନାମଞ୍ଜୁର ହେବାରୁ ଉଭୟଙ୍କୁ ବିଚାର ଭିଭାଗୀୟ ହାଜତକୁ ପଠାଇ ଦିଆଯାଇଥିବା ଜଣାଯାଇଛି ।