ଟିଟିଲାଗଡ ରେଳ ଷ୍ଟେସନ ରୁ ୩୫ କେଜି ଗଞ୍ଜେଇ ଜବତ ୩ ଗିରଫ

ଟିଟିଲାଗଡ଼,୧୦/୦୭/୨୦୨୫(ଜେ.ଏନ୍.ଏସ୍.), ଟିଟିଲାଗଡ଼ ରେଳ ଷ୍ଟେସନ ପରିସରରୁ ଚୋରା ଚାଲାଣ ହେବାକୁଥିବା ୩୫ କେଜିରୁ ଉର୍ଦ୍ଧ ଗଞ୍ଜେଇକୁ ଅବକାରୀ ଓ ଆର୍.ପି.ଏଫ୍ ପୁଲିସର ମିଳିତ ଟିମ୍ ଜବତ କରିଛି । ଏଥିସହ ଘଟଣାରେ ସଂପୃକ୍ତ ୩ ଅଭିଯୁକ୍ତଙ୍କୁ ଗିରଫ କରାଯାଇଛି । ସୂଚନା ଅନୁଯାୟୀ ଟିଟିଲାଗଡ଼ ରେଳଷ୍ଟେସନ ପ୍ଲାଟଫର୍ମ ନଂ ୩ ରୁ ରାୟପୁର ଓ ଝାନସିକୁ ଗଞ୍ଜେଇ ଚାଲାଣ ହେଉଥିବା ନେଇ ଆର୍.ପି.ଏଫ୍ କୁ ସୂଚନା ମିଳିଥିଲା । ଆର୍.ପି.ଏଫ୍ ପକ୍ଷରୁ ଅବକାରୀ ପୁଲିସକୁ ଅବଗତ କରାଯିବା ପରେ ଏକ ମିଳିତ ଟିମ୍ ଗଠନ କରାଯାଇ ଚଢାଉ କରାଯାଇଥିଲା । ଗିରଫ ଅଭିଯୁକ୍ତଙ୍କ ମଧ୍ୟରେ କେସିଙ୍ଗା ଥାନା ଅନ୍ତର୍ଗତ ତହନସିର ଗ୍ରାମର ବିଜୟ ବାଗ(୩୪), ବୋରିଙ୍ଗପଦର୍ ର ସାପ୍ତେ ବାଗ(୩୦) ଏବଂ ଉତ୍ତରପ୍ରଦେଶ ରକସା ଥାନା ଅନ୍ତର୍ଗତ ଧିରମାରପରା ନିବାସୀ ବିରେନ ରାଇକ୍ୱାର ଥିବା ଜଣାପଡିଛି । ଜବତ ଗଞ୍ଜେଇର ପରିମାଣ ୩୫.୫୦୦ କେଜି ଓ ତାର ବଜାର ମୂଲ୍ୟ ୩ ଲକ୍ଷ ୫୫ ହଜାର ଟଙ୍କା ଥିବା ଅବକାରୀ ଥାନା ଅଧିକାରୀ ଆଶିଷ ବେହେରା ସୂଚନା ଦେଇଛନ୍ତି । ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ବେଳେ ଜାମିନ ନାମଞ୍ଜୁର ହେବାରୁ ବିଚାରବିଭାଗୀୟ ହାଜତକୁ ପଠେଇ ଦିଆ ଯାଇଥିବା ସୂଚନା ମିଳିଛି ।