ଟିଟିଲାଗଡ଼ ନିର୍ବାଚନ ମଣ୍ଡଳୀ ଉନ୍ନୟନ ପରିଷଦ ସମୀକ୍ଷା ବୈଠକ

ଟିଟିଲାଗଡ଼,୨୩/୧୧,(ଜେଏନ୍ଏସ୍),ସ୍ଥାନୀୟ ପୌର ପରିଷଦ କଲ୍ୟାଣ ମଣ୍ଡପ ଠାରେ ଶୁକ୍ରବାର ଟିଟିଲାଗଡ଼ ନିର୍ବାଚନ ମଣ୍ଡଳୀ ଉନ୍ନୟନ ପରିଷଦର ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ବିଧାୟକ ନବୀନ ଜୈନ ବିଭିନ୍ନ ବିଭାଗୀୟ ଅଧିକାରୀ ଓ ଜନ ପ୍ରତିନିଧିଙ୍କ ସହ ବିଭିନ୍ନ ସରକାରୀ ଯୋଜନାର କାର୍ଯ୍ୟକାରିତାକୁ ନେଇ ସମୀକ୍ଷା କରିଛନ୍ତି । ଡିଆରଡିଏ ପ୍ରକଳ୍ପ ନିର୍ଦ୍ଦେଶକ ପ୍ରଭାତ ମହାପାତ୍ରଙ୍କ ସଭାପତିତ୍ଵରେ ଆୟୋଜିତ ବୈଠକରେ ଡୁଡା ପ୍ରକଳ୍ପ ନିର୍ଦ୍ଦେଶକ ପ୍ରଫୁଲ୍ଲ କୁଜୁର, ଉପଜିଲ୍ଲାପାଳ ରେହାନ ଖତ୍ରୀ, ଗୁଡ଼ଭେଲା ବ୍ଲକ ଅଧ୍ୟକ୍ଷ ଅଶୋକ ଦୋରା, ପୌର ଅଧ୍ୟକ୍ଷା ମମତାଦେବୀ ଜୈନ ପ୍ରମୁଖ ମଞ୍ଚାସିନ ଥିଲେ । ଟିଟିଲାଗଡ଼ ନିର୍ବାଚନ ମଣ୍ଡଳୀ ଅନ୍ତର୍ଗତ ବିଭିନ୍ନ ଉନ୍ନୟନ ଯୋଜନା ଓ ଉନ୍ନୟନ ପ୍ରକଳ୍ପ କାର୍ଯ୍ୟକୁ ତ୍ଵରାନିତ କରିବା ସହ ଅଞ୍ଚଳର ବିକାଶକୁ ପ୍ରାଥମିକତା ଦେବା ଓ ଅଞ୍ଚଳବାସୀଙ୍କ ଆସ୍ଥାଭାଜନ ହେବାକୁ ବିଭାଗୀୟ ଅଧିକାରୀଙ୍କୁ ବିଧାୟକ ଶ୍ରୀ ଜୈନ କହିଥିଲେ ।ମୋହନ ସରକାର ଜନହିତୈଶି ସରକାର, ବିକାଶ ପାଇଁ ଅର୍ଥ ବାଧକ ସାଜିବ ନାହିଁ । ତେଣୁ ଅଞ୍ଚଳର ବିକାଶ ପାଇଁ ଯତ୍ନବାନ ହେବା ସହ ବିଭାଗୀୟ ଅଧିକାରୀ ଡିପିଆର ପ୍ରସ୍ତୁତ କରି ପଠାଇଲେ ସେ ଅନୁଦାନ ଆଣିବା ବ୍ୟବସ୍ଥା କରିବେ ବୋଲି ବିଧାୟକ ଉଲ୍ଲେଖ କରିଥିଲେ । କାର୍ଯ୍ୟରତ ବିଭିନ୍ନ ପ୍ରକଳ୍ପ ଗୁଡ଼ିକୁ ନିର୍ଦ୍ଧାରିତ ସମୟ ମଧ୍ୟରେ ସଂପୂର୍ଣ୍ଣ କରିବା, ବିଭିନ୍ନ ଜନକଲ୍ୟାଣ ଯୋଜନାରେ ହେଉଥିବା ଅନିୟମିତତା ପ୍ରତି ସଜାଗ ରହିବାକୁ ଉପସ୍ଥିତ ଅଧିକାରୀଙ୍କୁ ତାଗିଦ କରିଥିଲେ । କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଗୁଡଭେଲା ବିଡ଼ିଓ ସୋମ୍ୟକାନ୍ତ ବନଗୁଲା, ସଇଁତଳା ବିଡ଼ିଓ ବିନୟ ଭୋଇ, ଟିଟିଲାଗଡ଼ ବିଡ଼ିଓ ଚନ୍ଦ୍ରମଣି ନାଗ, ଏସଡିଏମଓ ପି.କେ. ନାୟକ, ସିଡ଼ିପିଓ ଗୋଲାପି ନାୟକ, ପୌର ନିର୍ବାହୀ ଅଧିକାରୀ ସନ୍ଦୀପ ଚନ୍ଦ୍ରକାର ପ୍ରମୁଖଙ୍କ ସହ ବିଭିନ୍ନ ବିଭାଗୀୟ ଅଧିକାରୀ ଉପସ୍ଥିତ ଥିଲେ ।