ଟିଟିଲାଗଡ଼,୧୦/୦୭/୨୦୨୫(ଜେ.ଏନ୍.ଏସ୍.),ଟିଟିଲାଗଡ଼ କୁମୁଡ଼ା ପାହାଡ଼ ଉପରେ ଥିବା ପୋଖରୀରେ ବୁଡ଼ି ଜଣେ ବି.ଟେକ୍ ଛାତ୍ରଙ୍କ ଅକାଳ ମୃତ୍ୟୁ ଘଟିଛି । ସୂଚନା ଅନୁଯାୟୀ ବଡ଼ମାଳ ଗୋଳାବାରୁଦ କାରଖାନାର ୯ ଜଣ ଛାତ୍ର ଏକାଠି ହୋଇ ଟିଟିଲାଗଡ଼ର ହୋଟେଲ ଡିଏନ୍ ରିସୋର୍ଟକୁ ଖାଇବାକୁ ଆସିଥିଲେ । ହୋଟେଲର ସୁଇମିଙ୍ଗପୁଲ କାର୍ଯ୍ୟକ୍ଷମ ନ ଥିବାରୁ ସେମାନେ ହୋଟେଲରେ ଖାଇବା ଅଡର ଦେଇ କୁମୁଡା ପାହାଡ଼ ଉପରେ ଥିବା ଏକ ପୋଖରୀକୁ ଗାଧୋଇବାକୁ ଯାଇଥିଲେ । ସନ୍ତରଣ ଜାଣି ନଥିବା ସବୁ ସାଙ୍ଗ ମେଳି ହୋଇ ପୋଖରୀକୁ ପଶିଥିବା ବେଳେ ଗୋଡ଼ ଖସିଯାଇ ଜଣେ ପାଣିରେ ବୁଡ଼ି ଯାଇଥିଲେ । ପାହାଡ଼ ଉପରେ ଥିବା କିଛି ଯୁବକ ସେମାନଙ୍କୁ ଉଦ୍ଧାର କରିବା ସହ ବୁଡ଼ି ଯାଇଥିବା ଛାତ୍ରକୁ ଖୋଜାଖୋଜି କରି ତାଙ୍କ ମୃତଦେହ ଉଦ୍ଧାର କରିଥିଲେ । ସ୍ଥାନୀୟ ଲୋକଙ୍କ ସହାୟତାରେ ସମସ୍ତଙ୍କୁ ଡାକ୍ତରଖାନା ନିଆଯାଇଥିବା ବେଳେ ପୁଲିସ ପହଞ୍ଚି ମୃତ ଛାତ୍ରଙ୍କ ଶବ ଜବତ କରି ବ୍ୟବଚ୍ଛେଦ କରାଇଥିଲା । ମୃତ ଛାତ୍ର ଜଣକ ଗୋଳାବାରୁଦ କାରଖାନା ଟାଉନ ଇଲେକ୍ଟ୍ରିକାଲ ମେଣ୍ଟେନେସ ସେକ୍ସନର ଜୁନିଅର ୱର୍କସ ମ୍ୟାନେଜର ସୁନିଲ କୁମାର ଗହିରଙ୍କ ଏକମାତ୍ର ପୁତ୍ର ବିପୁଳ ଗହିର(୧୮) ବୋଲି ଜଣାପଡିଛି । ବିପୁଳ ଭି.ସୁ.ଟ. ବୁର୍ଲା କଲେଜର ବି.ଟେକ୍ ଦ୍ଵିତୀୟ ବର୍ଷର ଛାତ୍ର ଥିଲେ । ଏହି ଅଭାବନୀୟ ଘଟଣାକୁ ନେଇ ଡାକ୍ତରଖାନା ପରିସରରେ ଶୋକାକୁଳ ପରିବେଶ ଦେଖିବାକୁ ମିଳିଥିଲା।
