ରୋଗୀଙ୍କ ମୃତ୍ୟୁ କୁ ନେଇ ପରିଜନଙ୍କ ରାସ୍ତାରୋକ

ଟିଟିଲାଗଡ଼,୧୨/୧୦,(ଜେଏନ୍ଏସ୍) ଟିଟିଲାଗଡ଼ ସରକାରୀ ଡାକ୍ତରଖାନାରେ ଅସ୍ଥାୟୀ କର୍ମଚାରୀ ଭାବରେ କାର୍ଯ୍ୟରତ ମୀତା ବେହେରାଙ୍କ ମୃତ୍ୟୁକୁ ନେଇ ତାଙ୍କ ପରିଜନଙ୍କ ଦ୍ଵାରା ରାସ୍ତାରୋକ କରାଯାଇଥିବା ଦେଖିବାକୁ ମିଳିଛି । ସୂଚନା ଅନୁଯାୟୀ ଟିଟିଲାଗଡ଼ ସ୍ଵାଧୀନପଡ଼ା ନିବାସୀ ମିତା ବେହେରାଙ୍କ ୨ ଦିନ ତଳେ ହାତ ଭାଙ୍ଗି ଯାଇଥିବା ବେଳେ ସେ ଅସ୍ଥିଶଲ୍ୟ ଚିକିତ୍ସା ପାଇଁ  ସହର ମଧ୍ୟରେ ଥିବା ଘରୋଇ କ୍ଲିନିକ “ଜୀବନ ଜ୍ୟୋତି ନର୍ସିଂ ହୋମ” ରେ ୧୧ ତାରିଖରେ ଭର୍ତ୍ତି ହୋଇଥିଲେ । ସେଠାରେ ଅସ୍ଥିଶଲ୍ୟ ବିଶେଷଜ୍ଞଙ୍କ ଦ୍ଵାରା ତାଙ୍କ ଅପରେସନ କରାଯାଇଥିଲା । ତେବେ ଅପରେସନ ପରେ ତାଙ୍କ ଅବସ୍ଥା ସଙ୍କଟାପନ୍ନ ହେବା ଦେଖି ତାଙ୍କୁ ବଲାଙ୍ଗିର ଡାକ୍ତରଖାନାକୁ ପଠାଯାଇଥିଲା । ସେଠାରେ କାର୍ଯ୍ୟରତ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତ୍ରୁଟିପୂର୍ଣ୍ଣ ଚିକିତ୍ସା ଯୋଗୁଁ  ମିତାଙ୍କ ମୃତ୍ୟୁ ଘଟିଥିବା ଅଭିଯୋଗ ଓ କ୍ଷତିପୂରଣ ଦାବୀ ନେଇ ମୃତକଙ୍କ ପରିବାର ଓ ସ୍ଥାନୀୟ ବାସିନ୍ଦାଙ୍କ ପକ୍ଷରୁ ଶବ ରଖି ରାସ୍ତାରୋକ କରାଯାଇଥିଲା । ଘଟଣାକୁ ନେଇ ମୃତକଙ୍କ ବଡ଼ଭାଇ ସନ୍ତୋଷ ବେହେରା ଓ ସ୍ଵାଧୀନ ପଡ଼ା ଯୁବଗୋଷ୍ଠୀ ପୃଥକ ପୃଥକ ଭାବରେ ଟିଟିଲାଗଡ଼ ଥାନାରେ ଲିଖିତ ଅଭିଯୋଗ କରିଥିଲେ । ଘଟଣାସ୍ଥଳରେ ପୁଲିସ ପହଞ୍ଚି ସ୍ଥିତି ନିୟନ୍ତ୍ରଣ କରିଥିଲା । ଥାନାରେ ମୃତକଙ୍କ ପରିଜନ ଓ ସମ୍ପୃକ୍ତ ଘରୋଇ କ୍ଲିନିକ୍ ମାଲିକଙ୍କ ମଧ୍ୟରେ ବୁଝାମଣା ହେବାସହ କ୍ଷତିପୂରଣ ବାବଦରେ ୫ ଲକ୍ଷ ଟଙ୍କା ପ୍ରଦାନ କରାଯିବା ପ୍ରତିଶୁତି ପରେ ରାସ୍ତାରୋକ ହଟିଥିଲା । ଘଟଣାକୁ ନେଇ ନର୍ସିଂ ହୋମ ନିଶ୍ଚେତକ ବିଶେଷଜ୍ଞ ଡାକ୍ତର ମୋହନ ଲାଲ ଜୈନଙ୍କୁ ଯୋଗାଯୋଗ କରାଯାଇଥିବା ବେଳେ ସେ ମୃତକଙ୍କ ପରିବାର ସଦସ୍ୟଙ୍କ ଅଭିଯୋଗକୁ ଖଣ୍ଡନ କରିବା ସହ ରୋଗୀ ଅସ୍ତ୍ରପ୍ରଚାର ପୂର୍ବରୁ ପଇଡ ପାଣି ପିଇଥିବା ଓ ଡାକ୍ତରଙ୍କୁ ଜଣାଇ ନ ଥିବା ଯୋଗୁଁ ଗୁରୁତର ହୋଇଥିବା କହିଥିଲେ ।ପ୍ରକାଶଯୋଗ୍ୟ ସେ ମୃତ ମହିଳା ଜଣକ ସ୍ଵାମୀ ପରିତ୍ୟକ୍ତା ହୋଇଥିବା ଓ ତାଙ୍କ ଏକ ୧୬ ବର୍ଷର ଝିଅ ଥିବା ବେଳେ ତାଙ୍କ ଆର୍ଥିକ ସ୍ଥିତି ସ୍ୱଚ୍ଛଳ ନ ଥିବା ଜଣାପଡ଼ିଛି ।