ମୋଦୀଙ୍କ ନୂଆ ମନ୍ତ୍ରିମଣ୍ଡଳ… କାହାକୁ ମିଳିଲା କେଉଁ ପଦ

ନୂଆଦିଲ୍ଲୀ (ଜେଏନ୍ଏସ୍),  ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ତୃତୀୟ ପାଳି ସରକାର ଶପଥ ନେବାର ଦିନକ ପରେ ମନ୍ତ୍ରୀମାନଙ୍କୁ ବିଭାଗ ବଣ୍ଟନ କରାଯାଇଛି। ଗୁରୁତ୍ବପୂର୍ଣ୍ଣ ବିଭାଗଗୁଡ଼ିକ ଭାଜପା ମନ୍ତ୍ରୀମାନଙ୍କୁ ଦିଆଯାଇଥିବାବେଳେ  ଅଧିକାଂଶ ଭାଜପା ମନ୍ତ୍ରୀମାନଙ୍କୁ ତାଙ୍କର ପୂର୍ବ ମନ୍ତ୍ରଣାଳୟ ପୁଣି ଥରେ ଦିଆଯାଇଛି ।  ପ୍ରଧାନମନ୍ତ୍ରୀ ନିଜ ପାଖରେ କାର୍ମିକ, ସାଧାରଣ ଅଭିଯୋଗ ଓ ପେନ୍‌ସନ, ଆଣବିକ ଶକ୍ତି ଓ ମହାକାଶ ବିଭାଗ ରଖୁଛନ୍ତି । ଅମିତ୍ ଶାହା ସ୍ଵରାଷ୍ଟ୍ର ମନ୍ତ୍ରଣାଳୟ ବଜାୟ ରଖୁଥ‌ିବାବେଳେ ଲକ୍ଷ୍ନୌ ଏମପି ରାଜନାଥ ସିଂଙ୍କ ହାତରେ ପୂର୍ବଭଳି ପ୍ରତିରକ୍ଷା ରହିଛି । ବରିଷ୍ଠ ଭାଜପା ନେତା ତଥା ନାଗପୁର ଏମ୍‌ପି ନୀତିନ ଗଡ଼କରୀ ପୂର୍ବଭଳି ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ ପାଇଥିବାବେଳେ ଏସ୍. ଜୟଶଙ୍କରଙ୍କ ହାତରେ ଦ୍ଵିତୀୟ ଥର ପାଇଁ ବର୍ହିବ୍ୟାପାର ମନ୍ତ୍ରଣାଳୟ ରହିଛି । ନିର୍ମଳା ସୀତାରାମନ୍ ପୂର୍ବଭଳି ଅର୍ଥ ମନ୍ତ୍ରଣାଳୟ ପାଇଥିବାବେଳେ ପୀୟୂଷ ଗୋୟଲ ବାଣିଜ୍ୟ, ଅଶ୍ଵିନୀ ବୈଷ୍ଣବ ରେଳ ମନ୍ତ୍ରଣାଳୟ ସହ ସୂଚନା ପ୍ରସାରଣ ପାଇଛନ୍ତି । ପୂର୍ବ ସରକାରରେ ସୂଚନା ଓ ପ୍ରସାରଣ ମନ୍ତ୍ରଣାଳୟ ଅନୁରାଗ ଠାକୁରଙ୍କ ହାତରେ ଥିଲା।

ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନଙ୍କୁ ନୂତନ ଭାବେ କୃଷି ସହ ଗ୍ରାମାଞ୍ଚଳ ବିକାଶ ମନ୍ତ୍ରଣାଳୟ ଦିଆଯାଇଛି । ସେହିପରି ହରିୟାଣାର ପୂର୍ବତନ ମୁଖ୍ୟମନ୍ତ୍ରୀ ମନୋହରଲାଲ୍ ଖଟ୍ଟାରଙ୍କୁ ଶକ୍ତି ସହ ଗୃହନିର୍ମାଣ ଓ ସହରାଞ୍ଚଳ ମନ୍ତ୍ରଣାଳୟ ଦାୟିତ୍ଵ ମିଳିଛି । ବରିଷ୍ଠ ଭାଜପା ନେତା ସି.ଆର୍. ପାଟିଲ ଜଳଶକ୍ତି ଏବଂ ଧର୍ମେନ୍ଦ୍ର ପ୍ରଧାନ ଶିକ୍ଷା ବିଭାଗ ପାଇଥିବାବେଳେ ଲୋକ ଜନଶକ୍ତି ପାର୍ଟି (ରାମବିଳାସ) ମୁଖ୍ୟ ଚିରାଗ ପାଶ୍ଵାନଙ୍କୁ ନୂତନ ଭାବେ ଖାଦ୍ୟ ପ୍ରକ୍ରିୟାକରଣ ମନ୍ତ୍ରଣାଳୟ ଦିଆଯାଇଛି । ଜେଡିଏସ୍ ନେତା ତଥା କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ଏଚ୍.ଡି. କୁମାରସ୍ଵାମୀ ଇସ୍ପାତ ଓ ଭାରୀ ଶିଳ୍ପ ଏବଂ ତେଲୁଗୁ ଦେଶମ ପାର୍ଟି (ଟିଡିପି)ର କିଞ୍ଜରାପୁ ରାମମୋହନ ନାଇଡୁଙ୍କୁ ବେସାମରିକ ବିମାନ ଚଳାଚଳ ମନ୍ତ୍ରୀ କରାଯାଇଛି । ରଭନୀତ ସିଂ ବିଜୁ ସଂଖ୍ୟାଲଘୁ ବ୍ୟାପାର ମନ୍ତ୍ରୀ ହୋଇଛନ୍ତି । ପୂର୍ବରୁ ଭୂବିଜ୍ଞାନ ମନ୍ତ୍ରୀ ଥିବା କିରେନ ରିଜିକୁ ସଂସଦୀୟ ବ୍ୟାପାର ବିଭାଗ ପାଇଛନ୍ତି। ଗଜେନ୍ଦ୍ର ଶେଖାୱତ୍ ସଂସ୍କୃତି ଓ ପର୍ଯ୍ୟଟନ ମନ୍ତ୍ରଣାଳୟ ପାଇଥିବାବେଳେ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା ସ୍ବାସ୍ଥ୍ୟ ସହ ରାସାୟନିକ ଓ ସାର ମନ୍ତ୍ରଣାଳୟ ଦାୟିତ୍ୱ ସମ୍ଭାଳିବେ। ଅନ୍ନପୂର୍ଣ୍ଣା ଦେବୀ ମହିଳା ଓ ଶିଶୁ ବିକାଶ ମନ୍ତ୍ରୀ ହୋଇଥିବାବେଳେ ବିହାରର ପୂର୍ବତନ ମୁଖ୍ୟମନ୍ତ୍ରୀ ତଥା ହିନ୍ଦୁସ୍ତାନୀ ଆମ ମୋର୍ଚ୍ଚା ମୁଖ୍ୟ ଜିତନରାମ ମାଞ୍ଜି ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (ଏସ୍ଏସ୍ଏମ୍ଇ) ମନ୍ତ୍ରଣାଳୟ ପାଇଛନ୍ତି।

ଅନ୍ୟମାନଙ୍କ ମଧ୍ୟରେ ଜେଡିୟୁ ନେତା ରାଜୀବ ରଞ୍ଜନ ସିଂ ଓରଫ ଲଲନ ସିଂଙ୍କୁ ପଞ୍ଚାୟତିରାଜ ସହ ମତ୍ସ୍ୟ, ପ୍ରାଣୀ ସମ୍ପଦ ଓ ଦୁଷ୍ପ ମନ୍ତ୍ରଣାଳୟ ଦାୟିତ୍ଵ ଦିଆଯାଇଥିବାବେଳେ ସର୍ବାନନ୍ଦ ସୋନୋଲଙ୍କୁ ବନ୍ଦର, ଜାହାଜ ଚଳାଚଳ ଓ ଜଳମାର୍ଗ, ବୀରେନ୍ଦ୍ର କୁମାରଙ୍କୁ ସାମାଜିକ ନ୍ୟାୟ ଓ ସଶସ୍ତୀକରଣ ବିଭାଗ, ପ୍ରହଲ୍ଲାଦ ଜୋଷୀଙ୍କୁ ଖାଉଟି ବ୍ୟାପାର, ଖାଦ୍ୟ ଓ ସାଧାରଣ ବଣ୍ଟନ ସହ ନୂତନ ତଥା ନବୀକରଣଯୋଗ୍ୟ ଶକ୍ତି ବିଭାଗ ମିଳିଛି । କୁଏଲ୍ ଓରାମ ଆଦିବାସୀ ବ୍ୟାପାର ବିଭାଗ ପାଇଥିବାବେଳେ ଗିରିରାଜ ସିଂଙ୍କୁ ବୟନଶିଳ୍ପ ଜ୍ୟୋତିରାଦିତ୍ୟ ସିନ୍ଧିଆଙ୍କୁ ଯୋଗାଯୋଗ ଉତ୍ତରପୂର୍ବାଞ୍ଚଳ ବିକାଶ ମନ୍ତ୍ରଣାଳୟ ଦିଆଯାଇଛି । ସେହିପରି ଭୂପେନ୍ଦ୍ର ଯାଦବ ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରାଳୟ ପାଇଥିବାବେଳେ ହରଦୀପ ସିଂ ପୁରୀଙ୍କୁ ପେଟ୍ରୋଲିୟମ ଓ ପ୍ରାକୃତିକ ମନ୍ତ୍ରଣାଳୟ ଦିଆଯାଇଛି । ମନସୁଖ ମାଣ୍ଡବ୍ୟ ଏଥର ଶ୍ରମ ଓ ନିୟୋଜନ ଏବଂ ଯୁବ ବ୍ୟାପାର ତଥା କ୍ରୀଡ଼ା ମନ୍ତ୍ରଣାଳୟ ପାଇଛନ୍ତି । ଜି. କିରେନ ରେଡ୍ଡୀ କୋଇଲା ଓ ଖଣି ମନ୍ତ୍ରଣାଳୟ ପାଇଛନ୍ତି ।

ସେହିପରି ସ୍ଵାଧୀନ ଦାୟିତ୍ଵରେ ଥିବା ରାଷ୍ଟ୍ରମନ୍ତ୍ରୀଙ୍କ ମଧ୍ୟରେ ରାଓ ଇନ୍ଦ୍ରଜିତ ସିଂ ପରିସଂଖ୍ୟାନ ଓ ଯୋଜନା ରୂପାୟନ ସହ ଯୋଜନା ଓ ସଂସ୍କୃତି ମନ୍ତ୍ରଣାଳୟ ପାଇଛନ୍ତି । ଜିତେନ୍ଦ୍ର ସିଂଙ୍କୁ ପୂର୍ବଭଳି ବିଜ୍ଞାନ ଓ ପ୍ରଯୁକ୍ତି ସହ ଭୂବିଜ୍ଞାନ ଏବଂ ପ୍ରଧାନମନ୍ତ୍ରୀ ନିଜପାଖରେ  କାର୍ଯ୍ୟାଳୟ, କାର୍ମିକ, ସାଧାରଣ ଅଭିଯୋଗ ଓ ପେନ୍‌ସନ, ଆଣବିକ ଶକ୍ତି ଓ ମହାକାଶ ବିଭାଗ ରଖିଛନ୍ତି । ଅର୍ଜୁନ ରାମ ମେଘୱାଲ ଆଇନ ଓ ନ୍ୟାୟ ସହ ସଂସଦୀୟ ବ୍ୟାପାର ବିଭାଗ ପାଇଛନ୍ତି। ଯାଦବ ପ୍ରତାପରାଓ ଗଣପତରାଓଙ୍କୁ ଆୟୁଷ ସହ ସ୍ଵାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଏବଂ ଜୟନ୍ତ ଚୌଧରୀଙ୍କୁ ଦକ୍ଷତା ବିକାଶ, ଔଦ୍ୟୋଗିକ ଏବଂ ଶିକ୍ଷା ମନ୍ତ୍ରଣାଳୟର ରାଷ୍ଟ୍ରମନ୍ତ୍ରୀ ସ୍ଵାଧୀନ ଦାୟିତ୍ଵ ଦିଆଯାଇଛି।