ଟିଟିଲାଗଡ଼ରେ ପୁଣି ସ୍କ୍ରବଟାଇଫସ : ଚାଷୀ ମୃତ

ଟିଟିଲାଗଡ଼,୨୬/୦୯,(ଜେଏନଏସ), ଟିଟିଲାଗଡ଼ ବ୍ଲକ ଶଗଡ଼ଘାଟ ପଞ୍ଚାୟତ ଅନ୍ତର୍ଗତ ପିପିଲିବନ୍ଧ ଗାଁର ଚାଷୀ ରୂପଧର ବିଷୋୟୀଙ୍କ ସ୍କ୍ରବ ଟାଇଫସ କୀଟ ଆକ୍ରମଣରେ ମୃତ୍ୟୁ ଘଟିଥିବା ସୂଚନା ମିଳିଛି । ‘ସ୍କ୍ରଵ ଟାଇଫସ’ ଯୋଗୁଁ ଚାଷୀ ମହଲରେ ଆତଙ୍କ ଦେଖାଦେଇଛି । ତେବେ ସ୍ୱାସ୍ଥ୍ୟ ବିଭାଗ ପକ୍ଷରୁ ଏହାକୁ ନେଇ କୌଣସି ସଚେତନତା କାର୍ଯ୍ୟକ୍ରମ ହାତକୁ ନିଆଯାଇ ନ ଥିବା ଯୋଗୁଁ ପୀଡ଼ିତ ରୋଗୀଙ୍କ ମଧ୍ୟରେ ଏହି ରୋଗ କୁ ନେଇ ଦ୍ୱନ୍ଦ ଦେଖାଯିବା ସହ ଚିକିତ୍ସାରେ ଅବହେଳା ହେଉଛି । ସଚେତନତାର ଅଭାବ ଯୋଗୁଁ ପ୍ରାଥମିକ ଅବସ୍ଥାରେ ରୋଗୀ ଏହାକୁ ସାଧାରଣ ଜ୍ଵର ବୋଲି ଭାବି ଅବହେଳା କରୁଥିବା ନଜିର ରହିଛି । ଫଳରେ କୀଟ ଆକ୍ରମଣର ମାତ୍ର କିଛିଦିନ ମଧ୍ୟରେ ରୋଗୀର ଅବସ୍ଥା ସଙ୍କଟାପନ୍ନ ହେବା ସହ ମୃତ୍ୟୁମୁଖ ରେ ପଡ଼ୁଥିବା ଦେଖାଯାଛି । ସ୍ୱର୍ଗତ ବିଷୋୟୀ ନିଜ ଚାଷ ଜମିକୁ ଯାଇଥିବା ବେଳେ ଏହି କୀଟ ଆକ୍ରମଣର ଶିକାର ହୋଇଥିଲେ । ପ୍ରଥମେ ତାଙ୍କୁ ଟିଟିଲାଗଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିବା ଓ ପରେ ବଲାଙ୍ଗୀର ଭୀମଭୋଇ ଡାକ୍ତରଖାନାକୁ ରେଫର କରାଯାଇଥିଲା । ତେବେ ସେଠାରେ ତାଙ୍କ ସ୍ୱାସ୍ଥ୍ୟବସ୍ଥା ଗୁରୁତର ହେବାରୁ ତାଙ୍କୁ ପୁନଃ ଅଧିକ ଚିକିତ୍ସା ପାଇଁ ବରଗଡ଼ ବିକାଶ ଡାକ୍ତରଖାନାକୁ ପରିବାର ଲୋକେ ନେଇଥିଲେ । ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କ ମୃତ୍ୟୁ ହୋଇଥିଲା । ସୂଚନା ଥାଉ କି ଧାନ କିଆରୀ, ଜଙ୍ଗଲ, ଆଖୁ କିଆରୀ, କପା କିଆରୀ ଇତ୍ୟାଦି କାର୍ଯ୍ୟରେ ସଂପୃକ୍ତ ରହୁଥିବା ବ୍ୟକ୍ତି ବିଶେଷଙ୍କୁ ଏହି କୀଟ ଆକ୍ରମଣ କରୁଥିବା ଜଣା ପଡ଼ିଛି । ସ୍କ୍ରୁବ୍ ଟାଇଫସ ଆକ୍ରାନ୍ତ ବ୍ୟକ୍ତିଙ୍କ ଶରୀରରେ ପ୍ରଥମେ ଘୁମୁରି ଭଳିଆ ଚିହ୍ନ ଦେଖାଦେବା ସହ ପରେ ସେହି ସ୍ଥାନ କଳା ପଡି ଚର୍ମ ମରିଯିବା ଭଳି ଲକ୍ଷଣ ଦେଖାଯାଇଥାଏ । ଆକ୍ରାନ୍ତ ବ୍ୟକ୍ତିକୁ ଜ୍ଵର ହେବା ସହ ନିଃଶ୍ୱାସ ପ୍ରସ୍ୱାଶ ନେବାରେ ସମସ୍ୟା ଉପୁଜିବା ସହିତ ମୁଣ୍ଡ ବ୍ୟଥା, ଶରୀର ଜଟିଳ ହୋଇଥାଏ । ଚିକିତ୍ସକଙ୍କ ମତ ଅନୁଯାୟୀ ରୋଗ ଚିହ୍ନଟରେ ବିଳମ୍ବ ରୋଗୀଙ୍କ ମୃତ୍ୟୁର ପ୍ରମୁଖ କାରଣ ହୋଇଥାଏ । ୨୦୧୪ ମସିହାରେ ପରେ ରାଜ୍ୟରେ ସ୍କ୍ରବ ଟାଇଫସ ଆକ୍ରାନ୍ତ ବ୍ୟକ୍ତି ଚିହ୍ନଟ ହୋଇଥିବା ବେଳେ ବର୍ତ୍ତମାନ ପର୍ଯ୍ୟନ୍ତ ଏହି ରୋଗରେ ଆକ୍ରାନ୍ତଙ୍କ ସଂଖ୍ୟା ରାଜ୍ୟ ସ୍ୱାସ୍ଥ୍ୟ ବିଭାଗ ସଠିକ୍ ପରିସଂଖ୍ୟାନ ପାଇ ନ ପାରିବା ସାଧାରଣରେ ବିସ୍ମୟ ସୃଷ୍ଟି କରିଛି । ସୂଚନା ଥାଉ କି, ସ୍କର୍ବ ଟାଇଫସ ରୋଗର ଚିକିତ୍ସା ପଦ୍ଧତିକୁ ନେଇ ସାଧାରଣରେ ବିଭ୍ରାନ୍ତି ଲାଗି ରହିଥିବା ବେଳେ ଡାକ୍ତରଙ୍କ ମଧ୍ୟରେ ମଧ୍ୟ ଏହାକୁ ନେଇ ମତଭେଦ ରହିଥିବା ଜଣାପଡିଛି ।